بدين: پاڪستان فشر فوڪ فورم ضلعي بدين جي اڳواڻن ۽ ڪارڪنن ايوانِ صحافت بدين اڳيان احتجاجي مظاهرو ڪيو، جنهن بعد پريس ڪانفرنس ڪندي هنن الزام هنيو ته پاڪستان فشر فوڪ فورم ۾ ڏار وجهي تنظيم کي ڪمزور ڪرڻ جون ڪوششون ڪيون پيون وڃن.
پاڪستان فشر فوڪ فورم ضلعي بدين جي صدر حاجي نبي بخش ملاح، مٺن ملاح، عبدالرحيم چنڊاڻي، محمد عمر ملاح، محمد قاسم ٻچو، سومار لوهار ۽ ٻين اڳواڻن پريس ڪانفرنس کي خطاب ڪيو.
اڳواڻن چيو ته پاڪستان فشر فوڪ فورم جي اڳوڻي چيئرمين مرحوم سيد محمد علي شاهه جي وفات کان پوءِ ماهيگيرن سيد مهراڻ علي شاهه کي فورم جو چيئرمين مقرر ڪيو، جيڪو سندن چوڻ موجب ماهيگيرن جي مسئلن ۽ حقن لاءِ ساڻن گڏ بيٺل آهي.
پريس ڪانفرنس ۾ اڳواڻن الزام هنيو ته هن وقت فورم ۾ اختلاف پيدا ڪرڻ ۽ تنظيم کي ڪمزور ڪرڻ جون ڪوششون ٿي رهيون آهن. هنن فاطمه مجيد ۽ مصطفيٰ ميراڻي تي الزام هنيو ته هو ڪجهه ماهيگيرن کي پاڻ سان ملائي الڳ گروپ ٺاهڻ جي ڪوشش ڪري رهيا آهن. ڄاڻايل الزامن بابت لاڳاپيل ڌرين جو موقف فوري طور سامهون نه اچي سگهيو.
اڳواڻن چيو ته سنڌ جا ماهيگير پاڪستان فشر فوڪ فورم جي چيئرمين سيد مهراڻ علي شاهه ۽ اڳوڻي چيئرمين مرحوم سيد محمد علي شاهه جي نياڻي ياسمين شاهه سان گڏ آهن. هنن چيو ته مرحوم سيد محمد علي شاهه ۽ سندس خاندان ماهيگيرن جي مسئلن ۽ حقن لاءِ ڊگهي عرصي کان آواز اٿاريندا رهيا آهن.
مظاهرين مطالبو ڪيو ته پاڪستان فشر فوڪ فورم کي ڪمزور ڪرڻ يا ان جي ڪم ۾ رڪاوٽ وجهڻ جون ڪوششون فوري طور بند ڪيون وڃن. هنن خدشو ظاهر ڪيو ته تنظيم ۾ اختلاف پيدا ڪرڻ جون ڪوششون ماهيگيري واري شعبي ۾ ٺيڪيداري نظام آڻڻ لاءِ ٿي سگهن ٿيون.
اڳواڻن پاڪستان پيپلزپارٽي جي چيئرمين بلاول ڀٽو زرداري، سنڌ جي وڏي وزير ۽ صوبائي وزير فشريز کان مطالبو ڪيو ته ماهيگيرن جي نالي تي حاصل ٿيندڙ وسيلا صرف ماهيگير برادري جي ڀلائي ۽ ترقي لاءِ استعمال ڪيا وڃن.
هنن ماهيگيرن لاءِ مختص وسيلن ۽ فشرمين ڪوآپريٽو سوسائٽي جي فنڊن جي شفاف ۽ آزاد آڊٽ جو پڻ مطالبو ڪيو. اڳواڻن چيو ته ماهيگيرن جي مفادن يا پاڪستان فشر فوڪ فورم کي نقصان پهچائڻ ۾ ملوث ثابت ٿيندڙ ماڻهن خلاف قانون موجب ڪارروائي ڪئي وڃي.